السلام عليكم ورحمة الله وبركاته
بداية أنا البتول عبدالله , طب بشري في جامعة الأميرة نورة .
ولكثرة الطلب ولأني أحب أشارك اللحظات المهمة من حياتي للمهتم واللي يحتاج الإفادة قررت أبدأ أكتب هالموضوع.
للأمانة ما أعرف بإيش ابدأ او ايش أوصف لأن هالسنة كانت مليانة أحداث وقرارات بما أن أكثر من نص المستوى الثاني كان تعليم عن بعد بسبب كورونا لكن إن شاء الله بحاول أجاوب على كل التساؤلات
وبالأيام الاولى ممكن يكون بالأيام التعريفية أو نفس اليوم اللي تطلعون فيه البطاقات الجامعية بيحددون لكم أختبار تحديد مستوى اللغة الإنجليزية .. كثير بنات كانوا يشيلون همه والبعض حتى كان يسأل نذاكر له؟؟ لكن الجواب فقط هو إختبار فقط يحدد مستواك باللغة ، يعني من خلاله بيصنفونكم على حسب مستواكم بحيث يكون بالشعبة مافيه تفاوت وهذا شيء بصالح الجميع ، طيب يا البتول تختلف ساعاتنا ؟ لا الجميع له نفس الساعات الدراسية اللي بيفرق من مستوى لمستوى فقط الأنشطة لمادة الانقلش ، بالعربي المستويات الأعلى انشطتهم مستواها أعلى وهذا ما يأثر على الدرجات ، ومستواك ما يأثر على قبولك للتخصص نهائيا فالأفضل الكل يحل على مستواه عشان الكل ينحط بالمكان المناسب .
تمام اختبرتي واستلمتي البطاقة الجامعية إيش اللي بيكون بعده؟ أول اسبوع دراسة وإيش بيكون فيه؟ غالبا بيكون اسبوع تعريفي بالجامعة وماراح تاخذون شيء فانبسطوا قد ماتقدرون وتمشوا بمبانينا الحلوة وتعرفوا عالجامعة زي ماسويت ، وإذا بدأت الدوامات معلمة الانقلش بتعلمكم مستواكم وبيكون يوم تعارف وممتع بإذن الله ، وفيه نقطة.. غالبا بيعطونكم برنامج تعريفي لموقع بيرسون اللي بتكون فيه الواجبات وللأمانه ماحضرت الا مرة وبغيت أنام فيه 😦 يعني تقدرون تسوون سكيب للأشياء التعريفية وإذا جاء وقتها بتفهمون كل شيء بس ركزوا انكم تنبسطووون بهالأسبوع .
الحين ندخل بالعمييق ايش بندرس ؟ كم عدد المواد؟ كيف ينحسب المعدل؟ هالأشياء كلها بجاوب عليها بإذن الله
المستوى الأول:
راح تدرسين فيه 6 مواد وهي : انقلش1 ، أحياء 101 ، إحصاء ، فيزياء ، مصطلحات طبية ، سلم 101
المستوى الثاني:
بيكون 7 مواد وهي : انقلش 2 ، أحياء 102 ،رياضيات ، كيمياء ،مهن صحية ،سلم 202 ، عرب
واللي يدروسون كيم وريض الترم الأول بياخذون فيز وأحص الترم الثاني وبتنعكسون وهكذا
تمام كثير سألوني عن صعوبة المواد وكيف أضمن ان معدلي يكون عالي فيها، كيف اطور نفسي فيها وإيش نظامك يابتول ؟ تحت بوصف لكم كل مادة بالتفصيل * التجارب من شخص لشخص تختلف دائمًا اقرئي عشان تاخذين اللي يناسبك وتستبدلين الأشياء اللي مو مناسبة لك بطريقتك*
أولا انقلش 1
هالمادة خفيفة جدًا وممتعة يعني اذا مستواك بالانقلش متوسط ماراح تبذلين أي جهد لمذاكرتها ، كلاسات الإنقلش للترم الأول كانت صباحي لي بس فيه نص من الدفعة مسائي والترم الثاني نتبادل المسائي صباحي والصباحي مسائي ، بس عن نفسي اعجبني الصباحي جدا لأن غالبا يكون فيه وقت فراغ ونراجع أنا وبنات الشعبة لأختباراتنا ونتساعد ، بس عالعموم الكل بإذن الله بيمر عالصباحي والمسائي . تمام وش المطلوب أسويه لهالمادة؟ المطلوب فقط تحبين معلمة المادة لأن بتجلسين معها مايقارب 3 ساعات يوميًا ، تشاركين بالأنشطة وعلى فكرة جدًا ممتعة أنشطة الأنقلش والكلاسات تفاعلية وممتعة ، المادة خفيفها أغلبها فوكابلري والقرامر متكرر من أيام الثانوي وجدا بسييط . طيب اختباراتها؟ انا عن نفسي كنت أذاكر المادة بليلتها لأن غالبا المواضيع بترسخ ببالك لأن كلاسات الأنقلش كثيرة فيتكرر الدرس لمدة اسبوع وحولها ، اما الإختبار نفسه كانت أغلب الأسئلة على قطعة ريدنق وشوي فوكاب وقرامر، ولا تخافون معلمة المادة بتعلمكم عن كل شيء قبل الاختبار وكيف بتكون الاسئلة وتدربكم عالريدينق. ومعلومة مهمة أنقلش1 هذا مو داخل بموزونة التخصيص ، اللي بيدخل انقلش2، بس مو معناته تهملون انقلش1 لأن محد يعرف وش القرارت اللي بتتغير فشدوا حيلكم مهما كان .
أحياء 101
هذي المادة بالذات إذا استصعبتيها بتصعب وإذا شفتيها سهلة بتسهل، عموما الترم الأول هو عبارة عن أحياء عام والمحاضرات الأولى جدًا بسيطة كانت أشياء بديهية ومنها تكوين الماء والخواص وليش الماء مهم والمحاضرات اللي بعدها بيكون نفس أحياء ثالث ثانوي على ما أعتقد ، كانت عن الكربوهيدرات والبروتينات واللي معهم، نهايتها عن الDNA ومشابه جدا للي بالثانوي وكانت هالمحاضرات ممتعة وبتحسون انكم صحي ، نصايحي المذاكرة أول بأول وحاولوا ماتراكمون المحاضرات قد المستطاع ، والجزء العملي فيها هو الغثيث بالنسبة لي ، للعملي بيعطونكم ملزمة وهي اللي الشرح عليها واختبارات العملي منها وهنا لاازم تركزون في محاضرات العملي عشان تعرفون ايش المهم وايش اللي تشدد عليه معلمة المادة وهكذا. بالبداية غالبا بتستصعبونها ولكن صدقوني مع التكرار والفهم بتصير المادة عسل وممتعة يعني انا ما استوعبت هالشيء الا على نهاية الترم.
إحصاء
هذي المادة الوحيدة اللي كل بنات التأسيسي يحبونها ويمدحونها، ليه؟ لأنها بسيطة جدًا ومحاضراتها قليلة وممتعة ومعلمات المادة يشرحونها من قلب يعني بعد كلاس الإحصاء العملي بتطلعين فاهمة كل شيء بإذن الله ، بتدرسون اشياء بسيطة غالبها من دراستك السابقة وإذا فيه شيء جديد بيكون جدا بسيط وممتع، المحاضرات بتكون قسم عملي وقسم نظري ، في النظري بتنشرح المحاضرة بينما العملي بيكون الحل والتدريب عالتمارين وحل الواجبات ، وببساطة في هالمادة حلي جميع الواجبات وافهمي الدرس بعد محاضرة النظري عشان بمحاضرة العملي تكونين فاهمه وتشاركين لأن بيكون فيه درجات مشاركة.
فيزياء
هالمادة بالبداية وما اخفيكم كنت خايفة منها ، كان كل همي كيف بدرسها بالأنقلش واكيد بتصعب ووو، ومن كثر وساوسي حتى بإختبار الميد الأول ماعرفت أذاكره وكان الاختبار مو سيء لكن مايتقارن بالميد الثاني رغم ان محاضرات الإختبار الأول كانت أسهل بكثيير وأبسط ، بس السبب لأني بعده عرفت ان المادة كنت مصعبتها فصعبت علي ، وبقول لكم نفس الشيء هالمادة ذاكروها باستمرار واحفظوا القوانين بعد كل محاضرة ولاتنسون أن الفيزياء أمتع مادة لأنها شاملة لجميع العلوم 3>. العملي: للأمانة جدًا ممتع ، التجارب جميلة ومعلمة المادة كانت تشرح من قلب وأعطونا لها ملزمة بعد كل تجربة نكتب النتائج والحل ، والإختبارات كانت من الملزمة ونصيحتي هنا بعد ركزوا بشرح معلمة المادة وشوفوا ايش تركز عليه واكتبوا معها الملاحظات اللي عالسبورة واهتموا للأدوات اللي بالتجارب وذاكروا كل شيء بشمولية تامة.
مصطلحات طبية
جينا لمادتي المفضلة ، هالمادة عسل رغم انها تعتمد بشكل جدا كبير عالحفظ لكن ممتعة جدا وفيها قوانين بالبداية لتسمية المصطلحات الطبية يعني ايش تضيفين بداية الكلمة وايش نهايتها وبالتالي يتغير معنى الكلمة كليًا ، بس هالمادة بالذات وأشدد وأقول لازم مذاكرة أول بأول وتكرار للمذاكرة لأن الحفظ فيها كثير ، ولو تحطين مذاكرتها بيوم فقط بتتداخل معاني الكلمات ببعض ، باختصار مادة سهلة بس لازم تدلعينها بوقتك . فيه إختبار إملاء يعني لازم تتدربين على سبلنق جميع الكلمات ، كان عليه أظن بالكثير درجتين وماعليكم إذا متدربين له بيكون جدا بسيط ومعلمة المادة بتعلمكم بوقتها متى بيكون الإختبار عشان تستعدون له ، وفيها بعد إختبار نطق يعني بتسمع معلمة المادة نطقك لكلمات تسحبينها قرعة ، وبرضوا بتعلمكم قبلها بوقت عشان تستعدون وتتدربون عالنطق .
سلم 1
للأمانه هذي أكره مادة وكانت عقدتي ، معلوماتها كثيير وصعب تدرسين لأن الكلام سرد ، كانت إلكترونية يعني المحاضرات عن طريق البلاك بورد وماهي بالجامعة ، إختبارها بيكون بالجامعة ونصيحتي احفظوا كل شيء ، كانت تتكلم عن الحضارة الإسلامية وأشياء ناسيتها، لها ملزمة يرسلونها لكم وتطبعونها ، ميزتها ماتدخل بموزنة التخصيص بس هذا مو معناته ماتشدون حيلكم فيها .
وبكذا خلصنا مواد الترم الأول ، تذكروا أن اللي قلته من رأيي الشخصي يعني الصعب عندي مو معناته يصعب عليكم ، وبعد ماخلصت الترم الأول أقدر أقول أن الصعوبات اللي حسيت فيها في البداية سواء من ناحية المواد أو نفسيتي اللي تغيرت عليها البيئة من المدرسة إلى جامعة كلها تلاشت مع التعود ، يعني المذاكرة تاخذ وقت أقل ، خف التوتر مع كل إختبار …. دايم البداية صعبة لكن صدقوني نهايتها بتتعودون وبتلاحظون هالشيء بنفسكم بإذن الله.
الترم الثاني
انقلش2:
ماكان مختلف كثير عن الأول ، المستوى صار متخصص أكثر ويتكلم يمكن عن مواضيع صحية بس ماهو صعب وممتع والكلاسات تفاعلية زي اللي قبله، المختلف هنا بهالترم بيكون المشروع هو البحث”عن أي موضوع صحي”، كل ثنتين ببحث وعليه على ما أظن 10 درجات بس معلمة المادة بتعلمكم عن كل شيء من الترم الأول ، وبعد اللي يختلف أن هالأنقلش بيكون داخل بمعدل التخصيص وعليه 6 ساعات فالكل يجتهد فيه واضمنوا ال أ بلس .
أحياء2:
هنا بيتغير كليا بتحسون أنكم فعلا طالبات صحي ، كل محاضرة تتكلم عن جهاز معين والشرح كان ممتع بس يحتاج مذاكرة أول بأول وفهم لأن المحاضرات أطول من قبل ودسمة أكثر، بالنسبة لي جدا استمتعت فيها وأغلب البنات يمدحونها أكثر من بايو1،والعملي فيها جدا ممتع فيه تجارب ومجسمات للجهاز اللي بتدرسونه وهكذا، رغم أني ببداية الترم استصعبته عن اللي فات لكن درسته وفعلا يوم تدرسين أشياء بجسمك المعلومة ترسخ أسرع وحب الفهم يزيد أكثر وكذلك أرجع أقول يبي لها اجتهاااد أكثر من بايو1.
رياضيات:
باختصاار اذا شاطرة بالماث طول الثانوي ، راح تشوفينه تافه لأن نسخ لصق مواضيع الثانوي بالبداية تصنيف الأعداد من ناحية حقيقية ،كلية، وصحيحة وهالأشياء ، وبعدها تبسيط المعادلات سواء جذرية أو غيرها ، وأيضا الدوال، بسيط وممتع واللي مو متمكنه بالماث بتقدر تشد حيلها فيها وتجيب درجات حلوة باذن الله ، وما أخفيكم إني كنت مستانسة عليها ، انتظر الماث من الترم الأول استمتع بالحل وأكثر مادة كنت ما أبذل فيها جهد وأحبها وأعترف اني يوم خلصتها حزنت لأن هذي آخر مرة أدرس فيها الماث 😦 .
كيمياء :
المادة غالبا ماراح تاخذون أشياء جديدة فيها ، يعني مواضيع الثانوي واذا شيء جديد بتلقون شروحات لها باليوتيوب ، بالنسبة لي ماحبيت الكيمياء رغم أن كل بنات الدفعة تقريبا يمدحونه ومنبسطين معاه ، طبعا لأني أفضل الفيزياء عليه فما قدرت أحبه 😦 ، المادة مو صعبة والنظري كانت معلمة المادة جدا متعاونة وشادة حيلها بالشرح وتحاول مانطلع الا وحنا فاهمين ، للأمانة الجزء العملي وتجاربة جدا ماكنت طايقتها بس الأرجح لأن معلمة العملي ماكانت تعطي المادة بالطريقة الصحيحة ، لكن بنات الشعب الثانية كانوا جدا مرتاحين بالعملي ويمدحونه فنقول بإذن الله ماتطيحون باللي درستني، ومثل ماقلت المادة خفيف فيها الجزء النظري بس لازم مذاكرتكم تكون شاملة للمحاضرات وأي أفكار فيها ، التجميعات لهالمادة بتفيدكم جدًا.
مهن صحية:
هذي المادة باختصار هي سوالييف ، يعني تعلمك بالبداية عن قوانين ومكونات المراكز الصحية وبعدها عن التخصصات وبعدها الوقاية من الأمراض المعدية والأسعافات الأولية ، يعني مادة انوجدت للحفظ لا أكثر ، كنت أقول للبنات أنها عبارة عن سلم بس بالأنقلش لأن المادة عبارة عن حشو وكنت مستثقلتها جدًا وخايفة منها لأني أكثر شخص يكره الحشو والحفظ ، ودايم اتساءل ومتخوفة من طريقة الأسئلة بالإختبارات بس يابنات ماعليكم جابوا الأسئلة بشكل واضح والكل طلع يمدح الإختبار ، بس يبيله حفظ وترتيب مفاهيم لا أكثر. فعالياتها كثير اتوقع بالبداية اعطونا اسبوع تعريف بالتخصصات الصحية بحيث كل يوم يتكلمون عن تخصص ، ومعلمة المادة تعطيكم اوراق تعبونها عن التخصص اللي تسمعون الشرح عنه، وهالشيء مفيد جدًا للي ماتعرف أو محتارة كيف ترتب رغباتها وكثير بنات استفادوا منه.
سلم 202:
للأمانة كنت مستانسة جدًا بهالسلم لأنه أبسط من اللي قبل بمراحل ، يتكلم عن أشياء بديهية وكلنا عارفينها مثلا المرأة والأسرة ، وبيكون الكتروني زي الترم الأول لكن الأختبارات بالجامعة “اختبرنا الكتروني بسبب كورونا” بس أنا قاعدة اتكلم في حال تعدلت الأوضاع ورجعت الدراسة بالجامعة كيف بيكون النظام، وكذلك السلم مو داخل بمعدل التخصيص بس مو معناته تهملونه خصوصا هالسلم لازم تجيبون أ بلس لأنه سهل .
عرب:
كانت محاضاراته الكترونية وبتختبرون بالجامعة وتنرسل لكم ملزمة فيها جميع الدروس عشان تطبعونها، بداية الدروس جدا تافهه عن الإملاء غالبه ولكن بالنهاية بتبدأ تصعب المادة لكن ككل المادة بسيطة وتقدرين تجيبين درجات حلوة بسهولة بإذن الله.
تجربتي للترم الثاني ما تشمل الأشياء اللي بتجربونها يمكن، لأن أكثر من ثلاث ارباعه كان عن بعد لكن صدقوني هالترم يحتاج جهد أكثر ، ممتع أكثر بس لازم تعطينه من وقتك أكثر .
نهايةً أرجع أكرر وأقول تجارب الناس تختلف ، انا استصعبت شيء مو معناته صعب عندك وأعطي نفسك الحق لين تجربين واحكمي بنفسك، واذا استصعبتي أي شيء دوري طريقة تسهله عليك، مثلا أنا أكره مواد الحفظ بس إذا بحفظ أذاكر ووأنا أمشي وفعلا هالطريقة عطتني نتائج مبهرة .
* الزي الرسمي للسنة التأسيسية وهو كان عاجبني جدًا ومو على اللي توقعته ” سكراب عنابي ” وفيه تدرجات وتختارين اللي يناسبك سكراب كنت احب الموفي فحرصت يكون لون سكرابي مايل للبنفسجي ، واللابكوت مهم وماتدخلين المعامل الا فيه وترا كثير يستقعدون للي تجي بدونه.
لنفسك عليك حق
يعني اعتدلي وأعطي نفسك حقها ، لا تتركين مذاكرتك وهمومك الدراسية تسيطر على حالتك النفسية طول الوقت ، نقصتي بمادة لا تعطينها كل وقتك بالحزن ، اعطي نفسك المجال تطورين نقاط ضعفك بالمذاكرة اللي خلتك تغلطين هالأغلاط وتذكروا دايم أن البدايات صعبة بس مع الوقت كل شيء يسهل ويتيسر وتتعودون ، بس أعطوا نفسكم الوقت وابذلوا الجهد.
تعاونوا دائمًا …
دائمًا تذكروا أن الناس للناس ، عندك معلومة أو أي شيء يفيد غيرك عمرك لا تبخلين فيها ، زميلتك سألت أفيديها ويابنات خصوصا الشرح للغير وتحته ألف خط …. ترا يفيدك قبل يفيد غيرك، يعني بتثبت عندك المعلومة للأبد لأنك شرحتيها لفلانة وغيركذا تكسبين فيها أجر .
طوري نفسك في هالسنة
هالسنة حاولي قد ماتقدرين تفيدين نفسك ، تطورين لغتك الأنجليزية وشخصيتك بالإلقاء والتحدث ، هالشيء بيكون سهل عليك خلال هالسنة لأن المعلمات غالبيتهم أجنبيات وبيشجعونكم وبيحاولون ينمون هالشيء ، وركزي بلغتك الأنجليزية وطوريها بالمخاطبة وأكسبي مفردات لأن بعد التخصص ماراح يكون فيه وقت لتطويرها قد الدراسة .
حسي بمتعة الحياة الجامعية!
لا تاخذين بكلام الناس أنها مجهده وتغلطين غلطات كثير قبلك، بداية أيامي كنت مقتنعة بهالفكرة أن الجامعة كرف ومافيها أي متعة ، وللأسف ضيعت على نفسي فرص كثير كنت أقدر استمتع فيها ، والحين دامي جربت المر والسهل بالتأسيسي قاعدة أقول أنها ممتعة ، يكفي بعد التعب تقدرين تكافئين نفسك مثلا بتمشية أو أي شيء تحبينه وصدقوني لذة الإنجاز هي أكبر متعة بالحياة .
اكتشفي أماكن الجامعة المفيدة
أول أسبوع دراسي بما أنه كان أسبوع تعريفي وماعندنا أي شغله ، كنا نتمشى ونكتشف الجامعة ، للأمانه تكررت روحاتي للمكتبة المركزية وكنت اتمشى وأشوف الاثار والتحف واللوحات والمبنى وتصميمه الداخلي ، وبعد ما بدأنا بالمحاضرات بدينا نروح أنا وزميلتي بالشعبة للقاعات الدراسية بالمكتبة المركزية ونخطط ونراجع مع بعض كتغيير للجو ، وفعلا استفدنا كثير .
بعد ما زاد الضغط وصار غالبا مافيه وقت أروح للمكتبة المركزية ، بكليتنا فيه مكتبة تأسيسي ومرتبة جدا وفيها غرف دراسية مغلقة وسبورة تشرحين فيها لنفسك وتذاكرين براحتك بدون مايكون فيه أحد حولك .
وفيه خدمات طالب بالكلية تطبعين وتنسخين وتخلصين أشغالك فيها بدون ماتطقين مشاوير للمكتبات ، وأحيانا يبيعون فيها الملازم المطلوبة منك بأسعار رمزية .
وفيه المسطحات الخضراء إذا تبين تريحين نفسك وتفطرين على خضار وأنصحكم فيها بالشتاء وهالمكان فعلا مرتبط بذكريات جدًا جميلة .
وأخيرًا السنة هذي أضافت لحياتي الكثيروغيرت فيني الكثير ، تعلمت أشياء كثير من الجانب الشخصي ومريت بتجارب كثير ، حاولوا تستغلون كل نقطة فيها وتحبونها لأنها الأساس والخطوة الأولى اللي بتبنون عليه مستقبلكم المهني ، لا تتركون الضغط النفسي ينسيكم متعتها أبدًا لأن صدقوني الضغط النفسي بيجي من المنافسة مو بسبب الدراسة نفسها ، لكن الكل لازم يكون واثق بنفسه ويحس أنه مميز عن غيره ويجتهد بطريقته ويتمنى للي حوله كل الخير وبكذا بتقطعون طريقكم بثقه ونجاح بإذن الله.
أتمنى التوفيق لكم وأنكم استفدتم من الموضوع وأي سؤال لا تتردون تسألوني أنا موجودة دائمًا للإفادة ❤️
والحمدلله رب العالمين
أي سؤال موجودة بتويتر
@lib2li
البتول عبدالله 